ពួកធម៌បីៗ  ដែលរាប់ក្នុងការសង្គាយនា

(បិដក​ លេខ១៩  ទំព័រ១៣៤​​ ដល់ ១៤៦)

(៩៩)  ម្នាលអាវុសោទាំងឡាយ មានពួកធម៌បី ៗ ដែលព្រះមានព្រះភាគអង្គនោះ ជាអរហន្តសម្មាសម្ពុទ្ធ ទ្រង់ជ្រាបច្បាស់ ឃើញច្បាស់ ទ្រង់សំដែងទុកហើយដោយប្រពៃ គួរតែយើងទាំងអស់គ្នា សង្គាយនាក្នុងធម៌នោះ ។បេ។ ដើម្បីសេចក្តីចំរើន ដើម្បីប្រយោជន៍ ដើម្បីសេចក្តីសុខ ដល់ទេវតានិងមនុស្សទាំងឡាយ ។ ពួកធម៌បី ៗ​ តើអ្វីខ្លះ ។

(៩៩) -០១: ពួកធម៌បី ៗ គឺ ឫសអកុសល ៣យ៉ាង គឺ លោភៈជាឫសនៃអកុសល ១  ទោសៈជាឫសនៃអកុសល ១  មោហៈជាឫសនៃអកុសល ១ ។

(៩៩) -០២:  ឫសកុសលបីយ៉ាង គឺ អលោភៈជាឫសនៃកុសល ១   អទោសៈជាឫសនៃកុសល ១    អមោហៈជាឫសនៃកុសល ១ ។

(៩៩) -០៣:ទុច្ចរិត ៣ យ៉ាង គឺ ទុច្ចរិតដោយកាយ​១  ទុច្ចរិតដោយវាចា ១   ទុច្ចរិតដោយចិត្ត ១ ។

(៩៩) -០៤: សុចរិត ៣ យ៉ាង គឺ សុចរិតដោយកាយ​១ សុចរិតដោយវាចា១ សុចរិតដោយចិត្ត១ ។

(៩៩) -០៥: សេចក្តីត្រិះរិះ ជាអកុសល ៣យ៉ាង គឺ សេចក្តីត្រិះរិះប្រកបដោយកាម ១ សេចក្តីត្រិះរិះប្រកបដោយព្យាបាទ ១ សេចក្តីត្រិះរិះប្រកបដោយការបៀតបៀន ១ ។

(៩៩) -០៦: សេចក្តីត្រិះរិះ ជាកុសល ៣យ៉ាង គឺ សេចក្តីត្រិះរិះប្រកបដោយការចេញចាកកាម ១ សេចក្តីត្រិះរិះប្រកបដោយការមិនព្យាបាទ ១  សេចក្តីត្រិះរិះប្រកបដោយការមិនបៀតបៀន ១ ។

(៩៩) -០៧: ម្រិះ ជាអកុសល ៣យ៉ាង គឺ តម្រិះ ប្រកបដោយកាម ១  តម្រិះប្រកបដោយព្យាបាទ ១ តម្រិះប្រកបដោយការបៀតបៀន ១ ។

(៩៩) -០៨: តម្រិះ ជាកុសល ៣យ៉ាង គឺ តម្រិះប្រកបដោយការចេញចាកកាម ១   តម្រិះប្រកបដោយការមិនព្យាបាទ ១  

តម្រិះប្រកបដោយការមិនបៀតបៀន ១ ។

​(៩៩) -០៩: សេចក្តីសំគាល់ ជាអកុសល ៣យ៉ាង គឺ សេចក្តីសំគាល់ប្រកបដោយកាម ១  សេចក្តីសំគាល់ប្រកបដោយព្យាបាទ ១ សេចក្តីសំគាល់ប្រកបដោយការបៀតបៀន ១ ។ 

(៩៩) -១០: សេចក្តីសំគាល់ ជាកុសល ៣យ៉ាង គឺ សេចក្តីសំគាល់ប្រកបដោយការចេញចាកកាម ១   សេចក្តីសំគាល់ ប្រកបដោយការមិនព្យាបាទ ១  សេចក្តីសំគាល់ប្រកបដោយការមិនបៀតបៀន ១ ។  

(៩៩) -១១: ធាតុ ជាអកុសល ៣យ៉ាង គឺ ធាតុប្រកបដោយកាម (¹)១  ធាតុប្រកបដោយព្យាបាទ ១ ធាតុប្រកបដោយការបៀតបៀន ១ ។

(៩៩) -១២: ធាតុ ជាកុសល ៣យ៉ាង គឺ ​ធាតុប្រកបដោយការចេញចាកកាម(²) ១  ធាតុប្រកបដោយការមិនព្យាបាទ ១

ធាតុប្រកបដោយការមិនបៀតបៀន ១ ។

(៩៩) -១៣: ធាតុ ៣យ៉ាង ដទៃទៀត គឺ  ធាតុប្រកបដោយកាម(³)១  ធាតុប្រកបដោយរូប ១ ធាតុប្រកបដោយអរូប ១ ។

(៩៩) -១៤:  ធាតុ ៣យ៉ាង ដទៃទៀត គឺ ធាតុប្រកបដោយរូប១ ធាតុប្រកបដោយអរូប ១ ធាតុប្រកបដោយសេចក្តីរលត់ គឺព្រះនិព្វាន ១ ។

(៩៩) -១៥:  ធាតុ៣យ៉ាង ដទៃទៀត គឺ ធាតុយ៉ាងទាប(⁴)១  ធាតុយ៉ាងកណ្តាល(⁵) ១  ធាតុយ៉ាងឧត្តម(⁶) ១ ។

(៩៩) -១៦:  តណ្ហា ៣ យ៉ាង គឺ កាមតណ្ហា (⁷)១   ភវតណ្ហា(⁸) ១   វិភវតណ្ហា(⁹) ១ ។ 

(៩៩) -១៧: តណ្ហា ៣ យ៉ាង ដ៏ទៃទៀត គឺ កាមតណ្ហា ១   រូបតណ្ហា(¹⁰) ១   អរូបតណ្ហា(¹¹) ១ ។

(៩៩) -១៨: តណ្ហា ៣ យ៉ាង ដទៃទៀត គឺ រូបតណ្ហា ១ អរូបតណ្ហា ១ និរោធតណ្ហា (¹²)១។

(៩៩) -១៩: សញ្ញោជនៈ ៣​យ៉ាង គឺ សក្កាយទិដ្ឋិ(¹³) ១ វិចិកិច្ឆា(¹⁴) ១ សីលព្វតបរាមាស(¹⁵) ១ ។

(៩៩) -២០: អាសវៈ ៣​យ៉ាង គឺ កាមាសវៈ (¹⁶) ១ ភវាសវៈ (¹⁷)១ អវិជ្ជាសវៈ(¹⁸) ១ ។

(៩៩) -២១: ភព ៣ គឺ កាមភព(¹⁹) ១  រូបភព (²⁰) ១  អរូបភព (²¹) ១ ។

(៩៩) -២២: ការស្វែងរក ៣​យ៉ាង គឺ ស្វែងរកកាម ១  ស្វែងរកភព ១  ស្វែងរកព្រហ្មចរិយធម៌(²²) ១ ។

(៩៩) -២៣:មានៈ ៣ យ៉ាង គឺ មានៈថាអាត្មាអញប្រសើរជាងគេ ១ មានៈថាអាត្មាអញស្មើនឹងគេ ១ មានៈថាអាត្មាអញអន់ជាងគេ ១ ។

(៩៩) -២៤:កាល ៣ យ៉ាង គឺអតីតកាល ១ អនាគតកាល ១ បច្ចុប្បន្នកាល ១ ។

(៩៩) -២៥: អន្តៈ គឺចំណែក ៣ យ៉ាង គឺ សក្កាយ(²³)ជាចំណែក ១  ធម៌ជាគ្រឿងកើត(²⁴)នៃសក្កាយជាចំណែក ១  ធម៌ជាគ្រឿងរលត់(²⁵)នៃសក្កាយជាចំណែក ១​ ។

(៩៩) -២៦:វេទនា ៣ យ៉ាង គឺ សុខវេទនា ១ ទុក្ខវេទនា ១ អទុក្ខមសុខវេទនា ១ ។

(៩៩) -២៧:សេចក្តីលំបាក ៣​ យ៉ាង គឺ លំបាកព្រោះសេចក្តីទុក្ខ(²⁶) ១ សំបាកព្រោះសង្ខារ (²⁷)១  លំបាកព្រោះសេចក្តីប្រែប្រួល (²⁸)១​ ​​ ។

(៩៩) -២៨:គំនរ ៣​យ៉ាង គឺ សភាវខុសដ៏ទៀងទាត់ (²⁹) ជាគំនរ ១ សភាវត្រូវដ៏ទៀងទាត់ (³⁰) ជាគំនរ​ ១ សភាវមិនទៀងទាត់ (³¹) ជាគំនរ ១ ។

(៩៩) -២៩:សេចក្តីសង្ស័យ ៣ យ៉ាង គឺ បុគ្គលរមែងសង្ស័យងឿងឆ្ងល់ មិនចុះចិត្តស៊ប់ មិនជ្រះស្រឡះព្រោះប្រារព្ធនូវអតីតកាល ១   សង្ស័យងឿងឆ្ងល់ មិនចុះចិត្តស៊ប់ មិនជ្រះស្រឡះព្រោះប្រារព្ធនូវអនាគតកាល ១ សង្ស័យងឿងឆ្ងល់ មិនចុះចិត្តស៊ប់ មិនជ្រះស្រឡះព្រោះប្រារព្ធនូវបច្ចុប្បន្នកាល ១ ។

(៩៩) -៣០:អំពើដែលព្រះតថាគត មិនចាំបាច់រក្សា ឬ រវាំងមាន ៣ យ៉ាង គឺ ម្នាលអាវុសោទាំងឡាយ ព្រះតថាគតមាន កាយសមាចារបរិសុទ្ធ ព្រះតថាគតគប្បីរក្សានូវកាយទុច្ចរិតណាថា  អ្នកដទៃកុំបីដឹងនូវ កាយទុច្ចរិតរបស់អញនេះ   កាយទុច្ចរិតនោះមិនមានដល់ព្រះតថាគតឡើយ ១  ម្នាលអាវុសោទាំងឡាយ ព្រះតថាគតមាន​ វចីសមាចារបរិសុទ្ធ ព្រះតថាគតគប្បីរក្សានូវវចីទុច្ចរិតណាថា អ្នកដទៃកុំបីដឹងនូវវចីទុច្ចរិតរបស់អញនេះ វចីទុច្ចរិតនោះមិនមានដល់ព្រះតថាគតឡើយ ១   ម្នាលអាវុសោទាំងឡាយ ព្រះតថាគតមានមនោសមាចារបរិសុទ្ធ ព្រះតថាគតគប្បីរក្សានូវមនោទុច្ចរិតណាថា អ្នកដទៃកុំបីដឹងនូវមនោទុច្ចរិតរបស់អញនេះ មនោទុច្ចរិតនោះមិនមានដល់ព្រះតថាគតឡើយ ១ ។

(៩៩) -៣១:កង្វល់ ៣ យ៉ាង  គឺរាគៈ ជាកង្វល់ ១ ទោសៈជាកង្វល់ ១ មោហៈជាកង្វល់ ១ ។

(៩៩) -៣២:ភ្លើង ៣​ យ៉ាង ​ ភ្លើងគឺរាគៈ ១  ភ្លើងគឺទោសៈ ១  ភ្លើងគឺមោហៈ ១ ។

(៩៩) -៣៣:ភ្លើង ៣ យ៉ាងដទៃទៀត ភ្លើងគឺអាហុនេយ្យបុគ្គល ១ ភ្លើងគឺទក្ខិណេយ្យបុគ្គល ១  ភ្លើងគឺគហបតី ១ ។

(៩៩) -៣៤: ការរាប់នូវរូបដោយចំណែក៣ គឺ រូបប្រកបដោយការឃើញផង ប្រកបដោយការប៉ះពាល់(³²)ផង ១   រូបមិនប្រកបដោយការឃើញ តែប្រកបដោយការប៉ះពាល់ (³³) ១ ​​​​​​ រូបមិនប្រកបដោយការឃើញផង មិនប្រកបដោយការប៉ះពាល់ (³⁴)ផង ១ ។

(៩៩) -៣៥:សង្ខារ ៣​ យ៉ាង គឺ បុញ្ញាភិសង្ខារ (³⁵)១ អបុញ្ញាភិសង្ខារ (³⁶) ១   អានេញ្ជាភិសង្ខារ(³⁷) ១ ។

(៩៩) -៣៦:បុគ្គល ៣ ពួក គឺបុគ្គលជា សេក្ខៈ (³⁸) ១ បុគ្គលជាអសេក្ខៈ(³⁹) ១ បុគ្គលមិនមែនជាសេក្ខៈ មិនមែនជាអសេក្ខៈ(⁴⁰) ១ ។

(៩៩) -៣៧:ភិក្ខុចាស់មាន ៣ ពួក គឺ ចាស់ដោយជាតិ ១ ចាស់ដោយធម៌១  ចាស់ដោយសន្មតិ ១ ។

(៩៩) -៣៨:បុញ្ញកិរិយាវត្ថុ ៣ ​យ៉ាង គឺ បុញ្ញកិរិយាវត្ថុសម្រេចដោយទាន ១ បុញ្ញកិរិយាវត្ថុសម្រេចដោយសីល ១  បុញ្ញកិរិយាវត្ថុសម្រេចដោយភាវនា ១ ។

(៩៩) -៣៩:ហេតុនៃការចោទ ៣ យ៉ាង គឺ ដោយឃើញ (⁴¹) ១ ដោយឮ (⁴²) ១ ដោយរង្កៀស (⁴³) ១ ។

(៩៩) -៤០: ការសេពកាម ៣យ៉ាង ម្នាលអាវុសោទាំងឡាយ ពួកសត្វមានកាមតាំងឡើង ពួកសត្វទាំងនោះ

ធ្វើអំណាចឲ្យប្រព្រឹត្តទៅក្នុងកាមទាំងឡាយដែលតាំងឡើង   ដូចជាមនុស្សទាំងអស់​ និងទេវតាពួក(⁴⁴)ខ្លះ  និងវិនិបាតិក(⁴⁵)ពួកខ្លះ នេះជាការសេពកាមទី ១​  ម្នាលអាវុសោទាំងឡាយ ពួកសត្វមានកាមដែលខ្លួននិម្មិតហើយ ពួកសត្វទាំងនោះ លុះនិមិ្មតហើយ ៗ ក៏ធ្វើអំណាចឲ្យប្រព្រឹត្តទៅក្នុងកាមទាំងឡាយ ដូចជាពួកទេវតា ក្នុងជាន់និម្មានរតី នេះជាការសេពកាមទី២ ម្នាលអាវុសោទាំងឡាយ ពួកសត្វមានកាមដែលទេវតាដទៃនិម្មិតឲ្យ ​ពួកសត្វទាំងនោះ ធ្វើអំណាចឲ្យប្រព្រឹត្តទៅក្នុងកាមទាំងឡាយ ដែលទេវតាដទៃនិម្មិតឲ្យ ដូចជាពួកទេវតាក្នុងជាន់បរនិម្មិតវសវត្តី នេះជាការសេពកាមទី៣ ។

(៩៩) -៤១:ការបានសេចក្តីសុខ ៣​យ៉ាង ម្នាលអាវុសោទាំងឡាយ មានពួកសត្វធ្វើនូវសេចក្តីសុខ (⁴⁶)ឲ្យកើតឡើងរឿយៗ ហើយទទួលនូវសេចក្តីសុខ (នោះ) ដូចជាពួកទេវតានៅក្នុងពួកព្រហ្មលោក នេះជាការបាននូវសេចក្តីសុខ ទី ១ ម្នាលអាវុសោទាំងឡាយ  ពួកសត្វដែលជោកជាំជ្រួតជ្រាប បរិបូណ៌ពាល់ត្រូវដោយសេចក្តីសុខហើយ  ពួកសត្វទាំងនោះ​

ជួនកាលបន្លឺឧទានក្នុងកាលម្តងៗថា សុខណាស់ហ្ន៎ សុខណាស់ហ្ន៎   ដូចជាពួកទេវតានៅក្នុងជាន់ អាផស្សរព្រហ្មលោក នេះជាការបាននូវសេចក្តីសុខទី ២​  ម្នាលអាវុសោទាំងឡាយ ពួកសត្វដែលជោកជាំជ្រួតជ្រាបបរិបូណ៌ ពាល់ត្រូវដោយសេចក្តី

សុខហើយ ពួកសត្វទាំងនោះសន្តោសនឹងសេចក្តីសុខដ៏ល្អិតប៉ុណ្ណោះ ទទួលសេចក្តីសុខក្នុងចិត្តដូចពួកទេវតានៅក្នុងជាន់

សុភកិណ្ហព្រហ្មលោក នេះជាការបាននូវសេចក្តីសុខទី ៣ ។ 

(៩៩) -៤២:បញ្ញា ៣ យ៉ាង គឺ បញ្ញាជារបស់សេក្ខបុគ្គល ១   បញ្ញារបស់អសេក្ខបុគ្គល ១   បញ្ញាជារបស់នេវសេក្ខានាសេក្ខា

បុគ្គល ១ ។

(៩៩) -៤៣:បញ្ញា ៣​យ៉ាងដទៃទៀត គឺបញ្ញាសម្រេចមកអំពីការគិត ១ បញ្ញាសម្រេចមកអំពីការស្តាប់ ១ បញ្ញាសម្រេចមកអំពីការចំរើន ១ ។

(៩៩) -៤៤:អាវុធ ៣ យ៉ាង បានដល់អាវុធ គឺសុតៈ (ពុទ្ធវចនៈ) ១   អាវុធគឺសេចក្តីស្ងាត់ (⁴⁷)១   អាវុធគឺបញ្ញា ១​ ។

(៩៩) -៤៥:ឥន្ទ្រិយ ៣ យ៉ាង គឺ ឥន្ទ្រិយដែលកើតឡើងដល់បុគ្គល​អ្នកប្រតិបត្តិដោយគិតថា អាត្មាអញនឹងបានដឹង

នូវធម៌ដែលមិនទាន់បានដឹង (សោតាបត្តិមគ្គញ្ញាណ ) ១ ឥន្រ្ទិយគឺញាណជាគ្រឿងដឹងច្បាស់ ​ (សោតាបត្តិផលញាណ  ។​បេ។ អរហត្តមគ្គញ្ញាណ ) ១  ឥន្រ្ទិយគឺសេចក្តីដឹងក្នុងធម៌ដែលបុគ្គលគួរដឹង  ច្បាស់ជាធម៌ដល់នូវទីបំផុតនៃកិច្ចដោយកិរិយាដឹង

( អរហត្តផលញ្ញាណ) ១ ។

(៩៩) -៤៦:ចក្ខុ ៣ យ៉ាង គឺ មំសចក្ខុ(⁴⁸) ១ ទិព្វចក្ខុ(⁴⁹) ១ បញ្ញាចក្ខុ(⁵⁰) ១ ។

(៩៩) -៤៧:សិក្ខា ៣ យ៉ាង គឺ អធិសីលសិក្ខា (⁵¹)១ អធិចិត្តសិក្ខា (⁵²)១ អធិប្បញ្ញាសិក្ខា (⁵³)១​ ។

(៩៩) -៤៨:ភាវនា ៣​យ៉ាង គឺ​​កាយភាវនា​(⁵⁴)១ ​ ចិត្តភាវនា(⁵⁵)​១ បញ្ញាភាវនា​(⁵⁶)១ ។

(៩៩) -៤៩:អនុត្តរិយៈ ៣ យ៉ាង គឺ ទស្សនានុត្តរិយៈ(⁵⁷) ការឃើញដ៏ប្រសើរ ១ បដិបទានុត្តរិយៈ (⁵⁸) សេចក្តីប្រតិបត្តិដ៏ប្រសើរ ១ វិមុត្តានុត្តរិយៈ(⁵⁹) ការរួចចាកកិលេសដ៏ប្រសើរ ១ ។

(៩៩) -៥០:សមាធិ ៣​ យ៉ាង គឺ សមាធិប្រកបដោយវិតក្កៈវិចារៈ (⁶⁰) ១ សមាធិមិនមានវិតក្កៈ មានត្រឹមតែវិចារៈ (⁶¹)១  សមាធិ មិនមានវិតក្កៈនិងវិចារៈ(⁶²) ។

(៩៩) -៥១:សមាធិ ៣ យ៉ាងដទៃទៀត គឺ សុញ្ញតសមាធិ ១   អនិមិត្តសមាធិ​១​   អប្បណិហិតសមាធិ ១ ។

(៩៩) -៥២:សេចក្តីស្អាត ៣ យ៉ាង គឺ សេចក្តីស្អាតដោយកាយ ១ សេចក្តីស្អាតដោយវាចា ១​ សេចក្តីស្អាតដោយចិត្ត​ ១ ។

(៩៩) -៥៣:ច្បាប់  (⁶³)អ្នកប្រាជ្ញ ៣ យ៉ាង គឺ ច្បាប់អ្នកប្រាជ្ញផ្លូវកាយ​ ១​​ ច្បាប់អ្នកប្រាជ្ញផ្លូវវាចា​ ១​ ច្បាប់អ្នកប្រាជ្ញផ្លូវចិត្ត​ ១ ។

(៩៩) -៥៤:-សេចក្តីឈ្លាស ៣​យ៉ាង ​គឺ  សេចក្តីឈ្លាសក្នុងការចំរើន ១ សេចក្តីឈ្លាសក្នុងការវិនាស ១  សេចក្តីឈ្លាសក្នុងឧបាយ (⁶⁴) ១ ។

(៩៩) -៥៥:-សេចក្តីស្រវឹង ៣ យ៉ាង គឺ ស្រវឹងដោយការមិនមានរោគ១  ​​ស្រវឹងដោយវ័យ ១ ស្រវឹងដោយជាតិត្រកូល ១ ។

(៩៩) -៥៦:-អធិបតេយ្យ ៣ យ៉ាង គឺ អត្តាធិបតេយ្យ(⁶⁵) ១ លោកាធិបតេយ្យ (⁶⁶) ១ ធម្មាធិបតេយ្យ (⁶⁷) ១ ។

(៩៩) -៥៧:កថាវត្ថុ ៣​យ៉ាង  គឺ បុគ្គលប្រារព្ធអតីតកាល និយាយពាក្យថា រឿងយ៉ាងនេះកើតមានក្នុងអតីតកាលហើយ ១

បុគ្គលប្រារព្ធអនាគតកាល និយាយពាក្យថា រឿងយ៉ាងនេះនឹងមានក្នុងអនាគតកាល ១ បុគ្គលប្រារព្ធបច្ចុប្បន្នកាល

ក្នុងកាលឥឡូវនេះ និយាយពាក្យថា រឿងយ៉ាងនេះកើតឡើងក្នុងកាលឥឡូវនេះ ១ ។

(៩៩) -៥៨:វិជ្ជា ៣ យ៉ាង គឺ ញាណជាគ្រឿងរឭកឃើញនូវខន្ធបញ្ចកៈដែលធ្លាប់នៅអាស្រ័យ ក្នុងកាលមុន ជាវិជ្ជា១  សេចក្តីដឹងក្នុងចុតិនិងបដិសន្ធិរបស់ពួកសត្វ ជាវិជ្ជា ១   សេចក្តីដឹងក្នុងធម៌ ជាគ្រឿងអស់ទៅនៃអាសវៈទាំងឡាយ ជាវិជ្ជា ១ ។

(៩៩) -៥៩:វិហារធម៌ (ធម៌ជាគ្រឿងនៅ​) ៣យ៉ាង​ គឺ ទិព្យវិហារ(⁶⁸) ១ ព្រហ្មវិហារ(⁶⁹) ១ អរិយវិហារ(⁷⁰) ១ ។ 

(៩៩) -៦០:បាដិហារ ៣​ យ៉ាង​គឺ ឥទ្ធិបាដិហារ្យ(⁷¹) ១ អាទេសនាបដិហារ្យ(⁷²) ១ អនុសាសនីបាដិហារ្យ(⁷³) ១ ។ ម្នាលអាវុសោទាំងឡាយ ពួកធម៌បីៗ ទាំងនេះឯង ព្រះមានព្រះភាគអង្គនោះ ជាអរហន្តសម្មាសម្ពុទ្ធទ្រង់ជ្រាបច្បាស់ ឃើញច្បាស់  ទ្រង់សំដែងហើយដោយប្រពៃ គួរយើងទាំងអស់គ្នា សង្គាយនាក្នុងធម៌នោះ មិនគួរទាស់ទែងគ្នាឡើយ ។ បេ ។ ដើម្បីសេចក្តីចំរើន ដើម្បីប្រយោជន៍ ដើម្បីសេចក្តីសុខ  ដល់ទេវតានិងមនុស្សទាំងឡាយ ។

ចប់ពួកធម៌បីៗ ដែលរាប់ក្នុងការសង្គាយនា